搜尋

我的動物守護靈是鯨魚,你呢?

我是一個鯨魚痴,幾歲大仲未知咩叫鯨魚嘅時候己經發夢見過好多次,有一日無意中睇明珠台知道咗夢中成日見到的超級大魚原來就係鯨魚,從此一發不可收拾地愛上!


幾乎所有同鯨魚有關嘅嘢都忍唔住買!哈哈!朋友都會送鯨魚嘢比我做禮物!最深刻係結婚蛋糕!但有好多時,唔太識分鯨魚同海豚的朋友會買咗海豚比我,而家屋企應該「養」咗最少有100條鯨豚吧!XD



~呢塊鯨魚布我超級喜歡,是在Art Feed Soul買的,感謝創作人畫幅咁靚咁有力量的作品!~


自從2009年踏上學習靈性知識開始,知道了有動物守護靈、力量動物等字眼,就發現連結動物守護靈係一件好好玩,可以更深入了解自己內心事!


~~同你玩個遊戲,試下找出自己的動物守護靈!~~


首先,問問自己:

-你有很喜歡嘅動物嗎?

-你身邊或夢中有經常見到嘅動物嗎?

-有無一啲動物讓你情緒有好大變化?


然後,請你合埋眼深呼吸,然後等待係內心浮出嚟嘅動物樣子,

通常第一個影像就係同你有啲連結嘅動物!


你唔需要刻意去用頭腦諗佢係咪你最最最鐘意嘅動物,如果浮出嚟係昆蟲都唔使擔心,因為昆蟲也是動物。


嘗試深入了解佢地,例如上網找資料啦、睇書啦、睇同動物有關嘅電視節目、親身同佢地接觸以及離地啲用冥想或阿卡西紀錄解讀都都可以!總有一啲好有用嘅訊息幫助你了解自己。


 

點樣了解?我會以簡單拆解鯨魚的方式給你參考,你也可以試試拆解一下,然後諗下同你自己有無相似的特質⋯⋯(以下括孤內的粉紅字係我的想法)


1.動物特徵與習性(代表你的性格


鯨魚中,我最喜歡係藍鯨、跟住係白鯨、然後到抺香鯨、座頭鯨⋯⋯

雖然都係鯨魚,但特徵習性完全不一樣,如果你對你喜歡的動物好了解,可以試特定地尋找關於呢種動物品種的一切。


藍鯨特徵:

世上最大的動物,比古代恐龍體積仲要大,成年藍鯨有3架大巴士加埋咁大架!(我身形都龐大㗎!哈哈!)


雖然大,但卻只食細粒到爆炸嘅小磷蝦,佢無牙,進食模式係吸一大啖海水,用鯨鬚過瀘海水後吞食物。(我食嘢都精挑細選㗎,一粒超細嘅殼或沙,我都會隔出嚟,細個時因為唔吞渣,爸爸會將所有食物榨汁,成日覺得如果食物唔使𡁻就吞到就慳好多力!一個字,懶)


佢温柔,緩慢,優哉游哉係海中唱歌游水,不急不忙,來去自由,地球整遍海都係佢嘅家。(最開心係日日優哉游哉,自由自在玩啦,去旅行就最開心,世界每個角落都是家,真係要感激發明飛機的人!)


深潛能力強,雖然用肺呼吸,但抗壓性強!不時深潛到大海、又不時上水面呼吸、快樂時仲會飛上水面,噴氣會因應心情噴出不同狀態的霧水柱!(抗壓性就要睇咩事,對於屋企人朋友嘅事,我抗壓性會好高,不過忍得勁就會爆;對於唔熱衷同覺得麻煩的事,忍一秒都嫌多。認為做人都夠苦,再要迫自己做唔喜歡的事係一種虐待!我要摒除!)


深潛前總會提高尾巴,Say Goodbye後就不見踪影,要再揾返佢就要再睇緣份。(係!我好鐘意隔一段時間就走佬,最長份工只係4年,最短係一個月,轉工中間會有去玩嘅時間,潛水期間,會比時間自己療傷,調整後有力量先再出嚟見人!)


你呢?有無揾到共通點呢?


下面個啲我打短啲,有人投訴我打太多字喇!哈哈!


2.有關動物的傳說或寓言(代表你的天賦能力)


藍鯨係高智慧生物,好多沿海族群會視鯨魚為「海洋之神」或「海之精靈」去供奉,但都有族群會視鯨魚為「海魔」,因為當抺香鯨同深海魷魚打交時的景象好似兩隻深海大怪物打交一樣!(朋友點評價我?有啲覺得我好Nice,好有親和力,相處好舒服、有啲覺得我冷淡,唔出聲同嬲時好似殺人犯咁恐佈,招惹我只有死路一條、有啲覺得我神怪,乜嘢靈性工具都去學下試下、有啲會覺得我離地著魔!哈哈!其實咁又如何,我都係自己做自己,對人的評價其實源於內心投射,是神是精靈還是魔,我都喜歡:)


講起同鯨魚有關的傳說,都係救人丫,報恩丫多⋯⋯鯨魚彷彿同人類有心靈感應,知道有人出事就去幫。(我對別人內心的呼救好敏感,保護弱少是與生俱來的能力,從前的我一見到有人被人蝦而受委屈,我一定會做「架兩」,發癲鬧走個啲人後會同受害者一齊哭!以前會咁樣做,現階段學會每個人都會有好多困境要面對,我要學會不插手,由得佢地去面對再成長,如果佢地想,我隨時都可以教佢地強壯自己的方法,當逆境再嚟嘅時候以智慧同慈悲去戰勝!)



3.家族模式及社交模式(代表你的人際關係課題)


藍鯨有龐大家族,遍佈整個地球,雖然不會時常見面,但會用雄厚歌聲去傳訊息,日刻聯絡,關心對方!雖然屬於群體生活族群,但藍鯨需要有自我發展空間,整個人生都係聚聚散散,看似孤單一人,但其實好搭馬!(今生的我揀了投生係一個龐大家族!只計阿媽個邊,都已經有50幾人,22個兄弟姐妹感情深厚!但家族越大,離離合合的次數同課題都會多!好處係,無論身處邊,都知好搭馬地有一班家人Support!蝦我哋嘅人等住受死啦*!哈哈哈!)

*由於了解到因果問題,明白到報仇同反擊係無用嘅,要用其他方法解決先岩!


4.死亡狀況(代表你的人生課題或特別貢獻)


藍鯨的死亡有個好靚好浪漫嘅名叫「鯨落」,佢嘅死亡過程能孕育海洋萬物,是送給大海最温柔的禮物。一隻死去嘅鯨魚可以用死亡創造出一套完整,又可維持上百種無脊椎動物生存長達幾十年甚至上百年的生態系統,成為孤獨海洋里最溫暖的綠洲。(唔知我死時有無咁勁呢?不過我在生嘅時候都想幫到更多人!希望做到吧!)


藍鯨的天敵係殺人鯨,身為同類竟然自傷殘殺!真係罪加一等!(希望會傷害同伴的人早日覺醒啦!)


你嘅動物又係咩呢?同你似唔似丫!


以下送上幾幅鯨魚作品比大家欣賞^^








454 次查看0 則留言

最新文章

查看全部